महुद येथे बँकेसमोरच पन्नास हजारांची लूट
सोमवार (दि. २०) रोजी दुपारच्या सुमारास महूद येथील सोलापूर जिल्हा मध्यवर्ती बँकेच्या समोर एक धाडसी चोरीची घटना घडली. बँकेतून पैसे काढून घराकडे निघालेल्या व्यक्तीची पिशवी हिसकावून चोरट्याने पळ काढल्याने परिसरात एकच खळबळ उडाली आहे.चिकमहूद येथील चंद्रकांत सदाशिव डिगोळे यांनी आज दुपारी महूद येथील सोलापूर जिल्हा मध्यवर्ती बँकेच्या शाखेतून आपल्या खात्यावरील पन्नास हजार रुपये रक्कम काढली. ही रक्कम व मोबाईल फोन त्यांनी एका पिशवीत ठेवून मोटारसायकलवरूनघराकडे निघाले होते. ते मोटारसायकल सुरू करत असतानाच त्यांच्या हालचालीवर पाळत ठेवणाऱ्या एका अज्ञात तरुणाने मागून धावत येत पिशवी हिसकावून घेतली आणि पलायन केले.ही घटना लक्षात येताच डिगोळे यांनी तात्काळ गाडी थांबवून लोकांच्या मदतीने चोरट्याचा पाठलाग करण्याचा प्रयत्न केला, मात्र तोपर्यंत तो पसार झाला होता. घटनेची माहिती मिळताच महूद पोलिसांनी घटनास्थळी धाव घेतली असून चोरट्याचा शोध सुरू आहे. बँकेच्या सीसीटीव्ही फुटेजच्या आधारे आरोपीचा शोध घेण्यास पोलिसांनी सुरूवात केली आहे
