ज्येष्ठ पत्रकार प्रसाद जोगळेकर काका यांचे हृदय विकाराच्या झटक्याने निधन
महाराष्ट्र पुरोगामी महाराष्ट्र न्यूज नेटवर्क नातेपुते (प्रतिनिधी)
अकलूज ता. माळशिरस येथील पुरोगामी विचारांचे अन्याय अत्याचाराला वाचा फोडणारे, ज्येष्ठ पत्रकार व राजकीय विश्लेषक प्रसाद जोगळेकर काका यांचे हृदयविकाराच्या तीव्र झटक्याने निधन झाले. मृत्युसमयी ते ६० वर्षांचे होते. त्यांच्या पश्चात पत्नी, एक मुलगा व एक मुलगी असा परिवार आहे.साप्ताहिक गावकुसच्या माध्यमातून त्यांनी आपल्या पत्रकारितेला सुरुवात केली होती. राज्यातील विविध दैनिकांचे प्रतिनिधी म्हणून त्यांनी काम पाहिले. सोलापूर जिल्ह्यासह मराठवाड्याची वरदायिनी असलेल्या उजनी पाणी प्रश्नावर त्यांनी आज (मंगळवार दि. २५ मे २०२१) सायंकाळी ५ वा. त्यांनी एक व्हिडिओ वार्तापत्र बनवले. त्यानंतर मित्रांशी गप्पा मारत असतानाच सायं ५.२५ वा. त्यांना अचानक चक्कर आली व ते कोसळले. मित्रांनी त्यांना ताबडतोब अकलूज येथील कार्यालयातून डॉ. देवडीकर यांच्या रुग्णालयात नेले. परंतु तोपर्यंत त्यांची प्राणज्योत मालवली. माळशिरस तालुक्याने एक हरहुन्नरी पत्रकार गमावला असल्याची खंत अनेक मान्यवरांनी व्यक्त केली.
